GeenStijl

GeenStijl esas nederlandana blogo fondita ye 10 aprilo 2003 da Dominique Weesie, Romke Spierdijk ed Arne Biesma.

La simbolo esas rozea krono en cirklo. La video-situo Dumpert uzas verda varianto dil sama krono-logo. En la Nederlandana, la termino "geen stijl" (literala tradukuro: nula stilo) uzesas por deskriptar ago da persono od organizuro qua indijas stilo o konveni.

GeenStijl ofte uzas provokiva tono kande ol referas altra interreto-situi e blogi. Komentanti che la situo nomizesas reaguurders, kombinuro dil verbo reageren (reaktar/komentar) e l'adjektivo guur (kolda/neafabla).

Famoze, en marto 2005 GeenStijl lansis projeto skope senpovigar la duesma Balkenende-guvernerio. GeenStijl anuncis che sua situo ke li volunte vehigus homi a Rotterdam, ube un ek la guvernerio-partisi konferis. Ta homi adherus kom nova membri che la konfero, e votus kontre partopreno dal partiso en la guvernerio. Ta atrapo kreis tumulto; mem la nacionala televizion-programo NOS Journaal priraportis l'evento.

La blogo atraktas cirkume 75.000 vizitanti singladie ed esas un ek la 10 maxim populara novajo-situi en Nederlando. Ye 17 marto 2006 la Telegraaf Media Groep aquiris 40% de GeenStijl. La kontrato asertite valoris 2,6 milion.

Segun Dominique Weesie il vidis merkato por harde-parolanta, "politikale nekorekta" blogo, kande il fondis GeenStijl en 2003, pro ke existinta blogi uzis linguo tro vulgara por la normala komunikili. Un traito di la blogo esas intence misortografiar quar-litera vorti por diminutar lia shok-efekto. La situo kritikesis pro la *xenofobiala ed extrema naturo dil komenti quin lekteri darfas publikigar. Redakteri e lekteri di GeenStijl inventis diversa nomi por referar enmigranti a Nederlando qui generale egardesas kom stereotipala e mokanta.

Kombine kun la reto di Weesie, qua esis raportisto por la jurnalo "de Telegraaf" dum plu kam 10 yari, to esis sucesoza formulo. Geenstijl balde adjuntis video-filmi kun Rutger Castricum kom raportero.

En mayo 2006, interreto-provizerii en Bonaire komencis boikotar GeenStijl pos ke la blogo publikigis sekreta e privata dokumenti dil Bonaireana publika persequisto Ernst Wesselius.

GeenStijl komencis laborar pri televizion-programo SteenGeyl kun la brodkasterio BNN en 2007. Weesie asertis ke li spensos "imposto-pekunio." Tamen, disputo eventis pri la kloko kande la programo brodkastesos, e produkto haltigesis. Du yari pose li iniciis sucesoza kampanio por fondar sua propra brodkasterio kun la nomo PowNed, qua komencis brodkastar che publika televiziono en septembro 2010.

En mayo 2017 plu kam 100 femina jurnalisti, politikistini, aktorini ed altra mulieri demandis reklamo-boikoto di GeenStijl. L'asertita motivo esis la sexuala fantazii, mem violentoza, qui aparis multafoye en la komenti-fako.

Kategorii: Interreto Nederlando Politiko