1.
Le bibliotheca del Universitate de Cambridge ha annunciate que duo quadernos scribite per Charles Darwin, con valor de multe milliones
de libras sterling, ha essite perdite durante vinti annos.
Un quaderno contine le famose schizzo "Arbore de Vita" del scientista del 19esime seculo, que explora le relation evolutionari inter le species.
Post un "cerca extensive", le curatores ha concludite que illos ha probabilemente essite furate.
Illes invoca le adjuta del publico in essayar trovar los.
"Isto es tristissime," dice Dr. Jessica Gardner, le bibliothecario del universitate, al BBC. "Nos cercara ubique," in essayar discoperir lo que eveniva, illa adde.
Le quadernos era vidite ultime vice in novembre 2000 post "un requesta interne" a remover illos ab un cellario special de manuscriptos pro esser photographate.
On prendeva illos a un studio temporari, que tunc era in un edificio temporari in le terra del bibliotheca del universitate proque labor de construction eveniva.
Il era solmente durante "un controlo routinari" duo menses postea que on discoperiva que illos mancava.
"Nos sape que illos era photographate in novembre," dice Dr. Gardner. "Ma nos non sape lo que eveniva inter tunc e le tempore in januario 2001, quando on determinava que illos non esseva in lor loco correcte sur le plancas."
"E regrettabilemente il ha nihil in le registro restante que dice nos alique plus."
2.
Al initio le bibliothecarios credeva que illos [le quadernos] forsan era reponite in le loco incorrecte. "Mi predecessores vero credeva que illos era misarchivate e que illes trovara los," adde Dr. Gardner, qui deveniva le director de servicios bibliothcari in 2017.
Il habeva plure cercas "intense" durante le annos. Illos omne trovava nihil.
Forsan il non es tan surprendente date le grandor del bibliotheca. Illo es vaste, continente plus que 200 km de plancas, circa le distantia ab Cambridge a Southampton per strata. Illo contine plus que 10 million mappas e manuscriptos e altere objectos.
Al initio de iste anno, Dr. Gardner arrangiava un nove cerca. Empleatos specialista cercava per zonas specific del cellarios del bibiotheca. Illes faceva un controlo "per le digitos" in 189 cassas que contine libros, designos e litteras per Darwin. Mais ancora nulle quadernos.
Un nove methodo era necesse, secundo Dr. Gardner. Illa dice que illa "non voleva acceptar" que le quadernos simplemente "reapparera".
Dunque illa e su equipa "completemente revideva lo que eveniva al tempore e nos repensava nostre comprension que illos era misarchivate."
"Reluctantemente io ha decidite que illo non era le juste conclusion."
In contrario, illa crede: "Iste quadernos ha probabilemente essite furate."
Furto, illa dice, "debe esser considerate como un possibilitate ab le initio e illo non era."
Processas de securitate, illa explica, ha essite "revidite" e "astringite" durante le ultime duo decennios.
"Si alique de iste significantia esserea introvabile nos reportarea lo al policia."
Le policia de Cambridgeshire ha nunc essite informate e le disparition del quadernos ha essite registrate in le Registro de Arte Perdite national de cultural artefactos mancante. Le policia ha anque addite le mancante quadernos al database de Interpol de obras de arte furate.
3.
In julio 1837, Charles Darwin era un juvene viro de etate 28 annos. A su casa in London, ille scribeva sur un pagina de un del su quadernos de corio rubie, "Io pensa". Tunc ille designava un schizza de un arbore.
Ille habeva recentemente retornate ab le Insulas Galápagos a bordo del nave HMS Beagle e processava ideas scientific inspirate per su viage.
"Iste quadernos vermente es le essayo per Darwin a poner a su le question re ab ubi species proveni, que es le origine de species?" explica Jim Secord, professor emerite de historia e philosophia de scientia al Universitate de Cambridge.
Plus que 20 annos postea, 24 novembre 1859, Darwin publicava un arbore de vita plus developpate in "On the Origin of Species".
"On quasi es in le capite de Darwin quando on reguarda iste quadernos," dice Professor Secord. "Illos es scripturas de omne sortas de information."
"On habe le senso que ille processa iste ideas rapidissimemente e que il es ille sorta de energia intellectual que, secundo me, le quadernos vermente exprime."
"Io admira James Joyce e io semper habe le impression que ille es como Leopold Bloom con steroides. On habe le senso de imagination scientific vermente profunde."
Ben que le quadernos ha essite digitalisate, Professor Secord dice que le copias pote nunquam reimplaciar le ver objecto.
"Que un objecto tan iconic se perde es vermente un tragedia."
4.
Le quadernos mesme es parve, non plus grande que un carta postal. On conservava los in un special cassa blau, circa le grandor de un libro.
Il es ancora possibile que le quadernos essera trovate. "Nos non cessara cercar," dice Dr. Gardner. Mais nos require cinque annos in plus pro completar un cerca plen del plancas e cellarios restante.
Interim, le bibliotheca invoca le adjuta del publico.
"Il ha bon exemplos ubi cosas ha essite trovate, gratias al adjuta del publico," dice Dr. Gardner.
"Dunque io vole invoca a membros del publico, empleatos e recercatores anterior, alicuno qui pote haber information utile."
Mais Dr. Gardner non vole specular re ubi le quadernos pote esser.
"Il es possibile que illos es sub un lecto, le plus bon scenario, alicuno non pote vender los o solmente tene los," illa adde.
"Nunc, securmente, mesmo anonymemente, contacta nos."
"Nos cerca tal indicios, per adjuta del policia, pro recovrar iste objectos pro le nation."
5. Qui era Charles Darwin?
Charles Darwin era un scientista anglese - naturalista, geologista e biologista - cognite pro su labor super le theoria de evolution per selection natural.
Su obra progressive, "On the Origin of Species", era publicate in 1859 e cambiava nostre pensamento super le mundo natural.
Al tempore illo era multo controversial, nam illo provideva evidentia que certe animales evolveva ab alteres, semblante le plus apte pro lor vicinitate. Isto contradiceva le establite credentia religiose que Deo creava omne creaturas, grande e parve.
Darwin studiava le divergentia de 18 species de aves passerine ["le pinciones de Darwin"] in le Insulas Galápagos, in le Pacific. Ille remarcava le diversitate grande in le forma e function del becco.
"Lumine se jectera sur le origine del humanitate e su historia," ille scribeva, como resultate.
In su secunde publication seminal, "The Descent of Man" in 1871, Darwin applicava su theoria al evolution de homines, suggerente que nos habe un ancestor commun con le grande simias.
(On nunc crede que Homo sapiens evolveva apud orangutanes, chimpanzes, bonobos, e gorillas.)
Simple mais profunde, su theoria es un del ideas scientific le plus influente de omne tempore.
Mesmo hodie, su conclusiones e implicationes affice religion, politica, economia e arte, ultra nostre comprension del mundo circa nos.
Secundo BBC News
James Chandler 26-Dec-20