La glaci-strato di Grenlando forsan desaparos dum la nexta 1.000 yari se global varmesko duros ye la nuna rapideso, raporto en la jurnalo Nature sugestas.
Jonathan Gregory e lua kolegi che l'Universitato di Reading dicas ke sua studii predicas augmento ye 8C dil temperaturo di Grenlando ante 2350.
Li kredas ke se la glaci-strato liquideskos, global mezvalora marnivelo elevos ye cirkume sep metri. Mem se global varmesko haltesos, l'elevo povos esar neinversigebla, li dicas.
La reserchisti evaluis ke Grenlando probable pasos varmeso-solio, preter quo la glaci-strato - maxim granda ecepte Antarktika - es nesustenebla sen multe plu granda diminuti di gas-emisi.
La mezvalora temperaturo di Grenlando bezonas augmentar ye nur 3C por liquidigar sua glaci-strato, ma ula model-studii predicas multe plu alta augmento ante la yaro 2350.
Traduko es la nova kresk-industrio dil EU
Kande 10 nova landi adheros l'Europana Uniono 1ma mayo, li adportos
extra non lingui adjuntenda al existanta 11 dil EU.
Povos mem esar 10 nova lingui, nam se Greka e Turka Chiprani votos por
riuniono ante lore, la Turka divenos la 21ma linguo dil EU.
Quale to funcionos? Mem kun 20, la Babel-turmo di Europa
frajileskas.
Duadek lingui implikas entote 190 posibla kombinuri (Angla-Germana,
Franca-Cheka, Finlandana-Portugalana, ec.), e trovar homo qua parolas,
exemple, amba Greka ed Estoniana, o Slovena e Lituaniana e quaze
neposibla.
Por cirkumirar ica problemo, la parlamento uzos plu multa
'itera-traduko', segun quo diskurso unesme tradukesas aden un linguo,
e pose aden plusa - e forsan aden quaresma o kinesma. Klare la
posibleso di erori es enorma.
"Se me es unesme en la kateno, ed eroras, lore omnu altra alonge la
kateno eroros same - o plu male", dicas Jana Jalvi, un ek la nov
Estoniana rekrutiti.
La Francophonie en Imaji
Kadre dil Dio Internaciona dil Francophonie (franca-parolantaro) 20ma
marto 2004, la retsituo
Francophonie en Images
ofras la posibleso ad interretani ed omni qui festas la 'Fête de
la Francophonie' konsultar la video-filmi dil spaco franca-parolanta,
kunprizentata unesmafoye che retsituo unika.
La tri kategorii - figuri, populi e kreivesi franca-parolanta -
permisas ni renkontrar la granda personesi dil Francophonie, quale
Léopold Sédar Senghor, Norodom Sihanouk, Aimé
Césaire o Cheikh Hamidou Kane.
Interretani povas navigar sur la mondomapo por renkontrar
franca-parolanti en la kin kontinenti. Li povas anke askoltar e vidar
kreeri dil tota Francophonie: skriberi (Antonine Maillet, Albert
Memmi...), muzikeri (Manu Dibango, Souad Massi...) cinemisti (Denys
Arcand, Youssef Chahine, Cheik Doukouré...), la stilisto Oumou
Sy...
Ica projeto es la frukto di partenereso inter OIF, TV5, la
televizion-jurnalo 'Espace francophone' e l'Instituto nacionala
audiovidala (Francia). 20ma marto es festo-dio ed okaziono por
celebrar la franca linguo, quo unionas 170 milion parolanti cirkum la
mondo, e kunvenigas anke 500 milion habitanti dil 56 stati dil
Organizuro internaciona dil Francophonie (OIF).
Segun l’Organisation internationale de la Francophonie
Aljeriana prezidanto rielektita per granda majoritato
ALGER (Reuters) - Prezidanto Abdelaziz Bouteflika ganis rielekto per
granda majoritato, segun ofical rezulti publikigita venerdie, divenante
l'unesma Aljeriana duktero qua retrovenas al povo per demokrata voto
depos 42 yari.
Ma l'opozanti plendis pri neyusteso e lua olima prima ministro qua
finis distante duesme apelis, argumentante ke la voto jovdie spoliesis
da enorma fraudo.
Usa deskriptis la voto kom "plusa pazo sur la voyo vers demokratio en
Aljeria". Bouteflika, qua dicis ke il bezonos duesma aprobo til 2009
por ferme direktar l'Islamana lando vers demokratio e merkat-ekonomio
pos brutal intercivitana milito, recevis 83,5 procento dil voti.
Bouteflika, en sua unesma ofical reakto pos sua gano, dicis ke il agos
"omno posibla por solvar la problemi" dil 32 milion Aljeriani. "Me
realigos mea promiso plubonigar l'omnadiala vivo di Aljeriani", il
dicis che nacionala televiziono.
Nova EU-membri plu optimista pri expanso kam nuna membri
Opinion-inquesto dal Austriana IMAS-instituto indikas ke esas plu multa
optimismo pri la futuro dil plugrandigita EU inter nova membri kam inter
nuna membri, AFP raportis 8ma aprilo.
On questionis 6.000 respondanti en Austria, Germania, Chekia, Hungaria e
Polonia. La lasta tri landi adheros 1ma mayo.
42 procento de Poloni es konvinkita ke sua lando profitos per
plugrandesko, dum ke 33 procento restas nekonvinkita pri l'avantaji dil
expanso.
En Hungaria, 34 procento es optimista e 27 procento egardas l'expanso
kun skeptikeso, dum ke en Chekia 35 procento es optimista e 33 procento
skeptika pri l'avantaji di expanso.
Kontraste, 46 procento de Austriani es skeptika pri expanso e 24 procento
favoras ol. Germani es mem plu kritikema, 47 procento esante skeptika
pri plugrandesko e 20 procento favorante ol.
Persson: EU-pekunio mustas donesar a nova membri
Sueda prima ministro Göran Persson dicis hiere ke esas "absurda" ke
Sueda kontributaji al EU iras ad ekonomiale sana regioni quale
Irlando.
"Mea-opinione esas absurda ke ni sendas pekunio al EU quo spensesas en
regioni kun alta ekonomiala normo - exemple, Irlando", dicis Sr Persson,
segun Sueda jurnalo Dagens Nyheter.
Parolante ad audantaro di politikal ciencisti de cirkum Europa che
Uppsala-universitato, il emfazis ke Suedia devas montrar ekonomiala
solidareso kun nova membro-stati. "La pekunio quon ni voluntas sendar a
Bruxelles mustas spensar precipue por krear infrastrukturo e sustenar
agrokultivo en la nova membro-stati", il dicis.
Ed il repetis ke membro-stati qui pagas plu multo a Bruxelles kam li
recevas devas ne pagar plusa pekunio. Ico "kreus tensi", il dicis.
Suedia esis un ek sis membro-stati qui signatis letro demandante limito
dil EU-budjeto e recente lansis inicio kun Nederlando por koaktar nuna
EU-stati sustenar sua propra povra regioni pos plugrandesko.