L'envenanta duktero dil Norvegiana konservema partiso Erna Solberg es pronta konsiderar du plebiciti pri EU-membreso - un pri ka Norvegia devas vizar membreso e plusa por aprobar la rezulto dil membreso-negocii.
Sn Solberg, di qua la partiso es un ek la guvernanta koaliso-partisi, dicis ad Aftenposten ke helpus Norvegia pri membreso-negocii se la majoritato del homi deklaris antee ke li volas adherar l'EU-klubo.
Prima ministro Kjell Magne Bondevik ja dicis ke il favoras du plebiciti. Il kredas ke esus tro riskoza komencar negocii triesmafoye sen savar ke majoritato de Norvegiani favoras.
Norvegia ja aranjis du plebiciti pri EU-membreso, en 1972 e 1994. Amba finis per vinko dal 'no'-partiso. La duktero dil Centro-Partiso, Åslaug Haga dicis ke l'ideo pri du plebiciti es nur taktiko por lurar la Norvegiana populo aden l'EU.
Paris 1400: Arto dum la regno di Charles VI
Prizento dil expozo pri arto dum la regno di Charles VI che la Louvre
en Paris, til 12ma julio.
Dum la regno di Charles VI (1380-1422), kande la situaciono politikal
ed ekonomial en Francia esis sempre plu desfacila, Paris, la chefurbo
dil rejio, afirmesis kom centro intelektal ed artala di unesma
rango.
Ica expozo ilustras l'aktiveso artala di epoko foye solena ed eceptala.
La maxim bel exempleri dil produkto Parisana dil 1400ma yari
prizentesos plu kam triacent verki, partikulare manuskripti, pikturi
sur ligno, vitraji e desegnuri.
Domeni importanta quale arkitekturo, interna ornaji, skulturo, ma egale
texuri kompletigos ica evoko dil fino dil Mezepoko.
Irlando duktas la mondo per senfuma lego
DUBLIN (Reuters) - Irlando divenis l'unesma lando dil mondo quo
interdiktas sigareti en omna sua restorerii e drinkeyi lundie, plezante
nefumeri ma astonante ula drinkeyestri qui mustas administrar
l'interdikto.
De noktomezo sundie, fumar divenis nelegala en preske omna laborerii,
klozita publika spaci e publika transporto, punisebla per amendi di
admaxime 3.000 euri.
Simila interdikita impozita en urbi e stati altraloke en la mondo,
inkluzante Kalifornia e Nov-York, Irlando es l'unesma lando quo impozas
tal interdikto nacionale.
"Me kredas ke ca demarsho provizos sana heredajo, ne nur por nuna ma anke
por futura generacioni qui fortunoze nultempe experiencos laborar en
klozita fumoza ambiento", dicis prima ministro Bertie Ahern lor la
komenco dil interdikto.
Opinion-inquesti konstante montras ke maxim multa Irlandani sustenas la
demarsho, e la guvernerio dicas ke mem 40 procento del fumeri en Irlando
favoras ol.
Fratuli vizas interdiktar Passion en Francia
Tri juda fratuli vizas en korto interdikto dil filmo da Mel Gibson, 'The
Passion of the Christ' (La Pasiono dil Kristo) en Francia.
La trio - Patrick, Jean-Marc e Gerard Benlolo - pregis judiciisto en
Paris interdiktar la kontroversal filmo, klamante ke ol incitos violento
kontre judi.
On kritikis la filmo pro esar kontre-Semida, akuzante ke ol blamas judi
tote pro la morto di Iesu. "Esas tanta violenta kontre-Semidismo en
Europa ke ni ne povas permisar ico", dicis Patrick Benlolo.
La Pasiono dil Kristo devas apertar en Francia merkurdie. La judiciisto
probable judikos lundie.
Kontre-semidismo kreskas en Europa
EUOBSERVER/BRUXELLES - Kontre-semida ataki kreskis en Europa dum la lasta
kelka yari, segun nova raporto editita merkurdie (31ma marto).
La raporto, editita dal kontre-semida instituto dil EU (EUMC) indikas ke
kin EU-landi vidis la maxim signifikant augmenti di kontre-semida ataki.
Ek ica kin - Francia, Germania, Nederlando, Belgia e Britania - Francia
vidis la maxim grand augmento, preske sisfoye tam multa ataki dum 2002
kam dum l'antea yaro.
Prizentante la rezulti al Europana Parlamento, la chefo dil EUMC Beate
Winkler dicis: "Europa havas problemo pri kontre-semidismo" adjuntante
ke "ol plumaleskis dum la lasta du o tri yari". "Generaligar ne es
facila, la maxim granda grupo di atakeri semblas esar yuna, desiluzionita
blanka Europani", notas la raporto quo exploras ataki en la 15 nuna
membro-stati dil EU.
Chiprani decidos pri divido dil insulo pos faliinta diskuti
Ka Chipro adheros l'EU dividita o ne nun decidesos dal Chiprani, pos ke
diskuti duktita dal UN en Suisia faliis atingar konkordo.
Aparta plebiciti aranjesos en la du Chiprana komunesi 24ma aprilo pri
fina kompromis-projeto prizentita dal Sekretario-Generala dil UN Kofi
Annan.
"Ica projeto es neeviteble kompromiso. Ol ne satisfacas la postuli di
omni. Ma me kredas ke ol egardas la central interesti, e traktas la
precipua sucii, dil homi ambalatere", Kofi Annan dicis fine dil
diskuti.
Malgre ke Grekia sucias pri la projeto, ol dicis ke la homi devas
decidar. "Desfortunoze, atingar konkordita solvo esis neposibla. Nun
la Chiprani e lia politikala dukteri devas fine decidar", Greka prima
ministro Costas Karamanlis dicis lastavespere.
Jurnalisto-grupo questionas l'apteso di Belgia kom EU-centro
EUOBSERVER/BRUXELLES - La Sekretario-Generala dil Internaciona Federuro
di Jurnalisti (IFJ), Aidan White, dicis ke la mala legala protekto di
jurnalisti en Belgia igas ol "tote neapta" kom hosto dil
EU-institucuri.
Parolante che konfero en Bruxelles 2ma aprilo Sr White dicis: "To quon
ni mustas postular hike, en Belgia, es la maxim alta posibla normi di
libereso por jurnalisti". "Semblas a me", il adjuntis, "ke nam Belgia
es un ek la maxim mala landi segun legala protekto di fonti ye nacionala
nivelo, ol es tote neapta kom la centro dil Europana Uniono quo responsas
pri la legal ed ekonomial administro di regiono di 25 landi."
Mantenar jurnalaro-libereso es aparte importanta en Bruxelles, il
konkluzis, quoniam esas plu multa stranjera korespondanti raportante pri
plu multa decidi kam irgaloke altra en la mondo.
La situaciono en Belgia emfazesis recente da timi pri politikal preso
ye jurnalisti kande raportisto arestesis en Bruxelles dal Belga polico.
Hans-Martin Tillack - korespondanto che Stern - arestesis en lua
hemo 19ma marto e komputor-aparati, movebla telefonili e dokumenti
sizesis de lua kontoro.
Franca kavaliero pronta por renkontrar Rejino
Dum sua statala vizito a Francia casemane, la Britana Rejino renkontros bele
vestizita, 85-evanto kun nivea haro qua es certe l'arki-Anglemo di la
lando.
Nature Maurice Druon es plu kam to. Il es anke celebrita skribero,
olima kultur-ministro, forta Gaulisto e membro di la Londonana Libera
Franci dum la duesma mondo-milito.
Il es olima prezidanto dil Academie Francaise - la maxim prestijoza
kultural instituto di Francia - che quo il divenis famoza pro sua
persistanta ma fine vana opozo dil feminigo di propra nomi.
Ed il es maxim memorata en Francia pro la fakto ke il skribis la vorti
dil maxim famoza nacionema kansono franca ecepte la Marseillaise. La
'Chant des Partisans' intencesis kom milito-kansono por la rezistanti,
ed ol sucesis brilante.
"Mea chefi kun De Gaulle demandis me e mea onklo - la skribisto Joseph
Kessel - skribar kansono por la rezistanti. Li savis ke nulo unionas
homi plu bone dum kombato kam kansono - aparte kande la soldati es
sekreta, kande li es armeo di ombri", il dicas hodie.
Mikra Estonia duktas interret-revoluciono
Inter l'olima komunista landi qui adheros l'Europana Uniono 1ma mayo,
Estonia es la maxim mikra, ma la maxim avancinta teknologiale.
L'olima Soviet-republiko, ube la parlamento deklaris ke interret-aceso
es bazala homala yuro, preterpasis EU-landi quale Francia ed Italia pri
uzo di movebla telefonili ed interret-konekti.
Ante deketri yari, kande Estonia riganis sua sendependeso del
Soviet-Uniono, nur duimo dil 1,4 milion homi havis mem telefon-lineo.
Estonia mustas financizar nov idei pro ke ol havas tre poko vendebla
ecepte la cerebri di sua homi, segun Ardu Reinsalu, chefo dil
teknologi-firmo Docobo. La fakto ke Estonia es mikra lando implikas ke ol mustas movar rapide, ed esar tre aktiva, segun Nicola Hijlkema dil
Estoniana Komerco-Skolo.
Ya, Estonia avancas rapide por kompensar la yardeki perdita sub
Soviet-dominaco. Esas senfila 'varmeyi' por interret-aceso omnaloke -
che gazolin-stacioni, biblioteki e kafeerii.