Europa Duimo de stati aranjos plebicito

EUOBSERVER/BRUXELLES - Adminime duimo de membro-stati dil EU aranjos plebicito pri la Konstituciono dum ke nur quar landi havas "poka posibleso" di populara voto pri la konkordo.

Segun raporto editita hodie dal Instituto pri Inicio e Plebicito, 12 membro-stati "preske certe" o "tre probable" aranjos plebicito. Quar landi - Germania, Belgia, Suedia e Britania - es le minim probabla ek la 25 nuna e futura membro-stati questionar civitani pri ka li volas Europana Konstituciono.

En Finlando, Polonia, Hungaria, Grekia, Italia, Estonia, Malta, Chipro ed Austria, la raporto dicas ke la situaciono es "necerta".

La konkordo mustas ratifikesar da 25 landi, sive per voto sive per la nacionala parlamento, ed esas nule certa ke la rezulto esos favoroza en omna landi. Se un lando refuzus - partikulare granda lando - politikal kaoso konsequus en l'Uniono.

Segun EUobserver

Europa duktas resercho pri solala, ondala e geotermal energio

Icasemane che la prob-situo 'Solala platformo' en Almeria (Hispania), l'Europana Komisiono prizentis la stando di sua reserch-programi pri alternativa energi-fonti, inkluzante solala, ondala e geotermala energio.

Mondal energi-konsumo duopleskos dum la nexta 50 yari, Europa nun tre dependanta ye stranjera fonti.

Aktuale, 41% del energi-konsumo en EU fondesas sur oleo, sequata da natural gaso (23%), karbono (14%), nukleala (15%) e nur 6% fondesas ye rinovigebla energio. La minaco di global klimat-chanjo e l'averti pri energi-sekureso koaktos Europa multe chanjar e diversigar sua proviz-fonti, dependante sempre plu ye rinovigebla energio.

L'EU prizentis strategio por duopligar la procento di rinovigebla energio, del nuna 6% a 12% ante 2010. Segun sua 6ma Fram-Programo di Resercho (FP6 2003-2006) l'EU konsakros 810 milion euro a rinovigebla energi-fonti.

Segun EuropaWorld

Findlandana komercisti pafita en Irak

Du Finlandana komercisti ocidesis da pafi en Baghdad.

Li apartenis delegaciono vizitante l'Irakana chefurbo kande li pafesis survoye al Elektro-Ministerio, segun Finlandana parolisto. La du viri es l'unesma Finlandani qui mortis en Irak depos l'Usana invado. Segun un raporto, li ocidesis sidante en sua automobilo.

Plu frue, Usana soldato ed Irakana interpretisto ocidesis kande apudstrada bombo explozis weste de Baghdad. Tri altra soldati vundesis. Detali pri l'atako emersis del Finlandana chefurbo Helsinki. "Me povas konfirmar ke du Finlandana komercisti pafesis e mortis en Baghdad icamatine", Rolf Johansson dil exterlandana ministerio dicis. La du viri esabis en Baghdad depos saturdio.

Segun BBC News Online

Taskogrupo pri klimat-chanjo lansita

Taskogrupo kompozita ek internaciona reserch-instituti lansesis lundie por afrontar klimat-chanjo.

Britana ex-ministro Stephen Byers prezidis l'unesma renkontro dil grupo en Windsor, Britania lundie. Sr Byers avertis ke klimat-chanjo es la "prima ambientala problemo" di nia epoko.

Segun la grupo, la partoprenanti asumas "responsiveso a futura generacioni poslasar a li planeto habitebla e richa ye vivo". Sr Byers dicis: "Klimat-chanjo produktita da gas-emisi de homal aktivesi minacas ta skopo".

On klamis ke klimat-chanjo povos extingar milion speci dil mondo ante 2050. Nur per diminutar gas-emisi e konservar karbo-dioxido on povos salvar multa speci, li avertis.

Segun BBC News Online

Lindh-ocidero enkarcerigita dumvive

La viro qua konfesis atakir Sueda exterlandala ministro Anna Lindh en butiko en Stockholm es enkarcerigita dumvive pro homocido.

Mijailo Mijailovic, qua evas 25 yari, negabis homocido, insistante ke il atakis pro "voci en sua kapo". Ma psikiatriala probi deklaris ke il esis mentosana kande il atakis lasta-septembre.

Korto en Stockholm judikis mardie ke il kulpis pri homocido. La korto dicis ke Mijailovic konciis konciis pri sua agi kande il atakis Sn Lindh repete, notante la severeso e violento dil atako.

Segun BBC News Online

Britana No-Kampanio pri euro cesas

La No-kampanio kontre l'euro cesos, pos la decido da Gordon Brown exkluzar fresh evaluo pri la kin ekonomiala adhero-probi.

Segun kampanieri esas "nula chanco" di plebicito pri euro ante 2008. Samtempe la kampanio por plebicito pri l'Europana Konstituciono koncentras sua esforci.

Franca prezidanto Jacques Chirac riacendis la kontroversal debato per dicar ke il esperis ke konkordo pri la Konstituciono esos atingebla EU-kunveno en junio.

La kampanio-grupo Voto 2004 dicis ke la komenti da Sr Chirac efektive iniciis la kampanio por plebicito.

Segun BBC News Online

Microsoft punisita per rekorda amendo dal EU

L'Usana molvaro-firmo Microsoft mustas pagar rekorda amendo di 497 milion euri al EU pro abuzar sua dominacanta poziciono.

L'EU judikis ke Microsoft kulpas pro inkluzar sua programo Windows Media Player kun sua populara operaco-sistemo Windows, tale ke uzeri di Windows ne bezonas komprar alternativa son- e video-programi quale Realplayer.

Microsoft mustos nun ofrar versiono di Windows sen la Media-programo dum la nexta 90 dii en Europa. Konkurenco-komisionano Mario Monti anke imperis Microsoft revelar sekreti di sua Windows-molvaro.

Malgre l'enormeso dil amendo, ol ne duktos a bankroto nam Microsoft posedas pekunio-stoko di plu kam $50 bilion. 90 procento dil personala komputori dil mondo uzas la Windows-molvaro. JC

Britana Konservemi pronta pri EU-Konstituciono

La Britana Konservemi indikis ke l'Europana Konstituciono esos un ek la precipua temi lor la venonta Europana elekti en junio e til la Britana elekto en 2005.

Rapida konkordo pri la Konstituciono semblante probabla dum l'unesma duimo di ca yaro, la Britana Konservemi preparas luktar. Merkurdie Michael Howard, duktero dil Konservemi dicis: "Ica Konstituciono es neaceptebla a me e, me kredas, a majoritato de homi en ca lando."

"Se me afrontus ta poziciono, me agus lo necesa por chanjar situaciono neaceptebla. Me kredas ke ni povos, kom envenanta Konservema guvernerio, agar lo necesa por sekurigar l'interesti di ca lando", il adjuntis.

Segun EUobserver

L'Aventuri di Tintin Sur la Maro

Prizento dil expozo pri la maral aventuri di Tintin che la Nacional Marala Muzeo en London, til 5ma decembro.

L'expozo 'L'Aventuri di Tintin Sur la Maro' festas la 75ma aniversario dil unesma aventuro dal kartun-raportero. Expozaji inkluzas la maxim anciena desegnuro di Tintin e pikturo dil kreinto di Tintin, Georges Remi (Hergé) da Andy Warhol.

Ica granda expozo apertesas che la Nacional Marala Muzeo (en Greenwich, London) 31ma marto asocie kun la Hergé-Fonduro.

Segun National Maritime Museum

EU-dukteri konkordas pri rivivigar la Konstituciono

EUOBSERVER/BRUXELLES - EU-dukteri komisis su ad atingar konkordo pri la Konstituciono dum l'unesma duimo di ca yaro.

Anuncante la decido, Irlandana prima ministro e nuna EU-chefo Bertie Ahern dicis ke la membro-stati konkordis pri kompletigar la Konstituciono ante la kunveno 17-18ma junio.

Li konkordas tri monati pos ke diskuti pri la Konstituciono krulis pro deskonkordo pri la nova propozita vot-sistemo. Lore Germania, quo favoras la sistemo, opozis Hispania e Polonia.

Dum ke Irlando e plur altra landi inkluzante la Benelux-landi, Dania, Polonia, Hungaria, Chekia e Slovakia volas konkordo ante l'Europana elekti, altri ne es certa. Francia e Britania partikulare timas ke l'elekti nemediate divenus plebicito pri la Konstituciono.

Segun EUobserver