Segun inquesto dal Instituto Polona CBOS, editita hiere e citita dal Figaro économique hodie, preske triimo de Poloni dicas ke li es pronta livar sua lando por laborar en Europa.
Ma nur 17% del inquestiti volas instalar su permanante kontre ke 61% nur previdas restar dum min kam un yaro.
Quarimo del interesata personi tamen previdas livar nur kondicione ke li profitos per labor-ofro.
Literaturo Chiniana che la Salon du Livre en Paris
La Salon du Livre (Salono di la Libro) duktas ni cayare vers
la fora horizonto di literaturo Chiniana.
Venanta de omnaloke - del kontinento, de Taiwan, de Hong Kong o de
exterlando - l'autori Chiniana deskovrigas ni sua Oriento, ed igas ni
partoprenar sua pasioni ed experienci. Quaradek autori venos por
revelar a ni la richeso e la denseso di sua skriburi.
Certe ca 24ma Salon du Livre esos, quale sempre, la granda
rendevuo inter la publiko e la romanisti, filozofi, ilustristi di yuneso
o di bendi desegnita, kurte kun la tota fermento di editala kreo. Omni
esos ibe por renkontrar, explikar, dialogar kun sua lekteri o simple kun
kuriozi. Por experiencar omna to, on do rendevuas kun plu kam 1.250
editeri de omna horizonti.
Almodovar minacata da proceso pri 'coup'
L'ekiranta regnanta partiso di Hispania minacis procesar kontre Hispana
film-direktisto Pedro Almodovar pro ke il akuzis li projetar "coup".
La Populara Partiso (PP) iracis pro lua alego ke ol projetis tardigar
la general elekto pos sundio por mantenar la povo. "Ni preske subisis
coup d'etat", Sr Almodovar dicis a jurnalar-konfero mardie.
"La PP plendos al apta korti", la partiso dicis. La direktisto referis
klami en la jurnalaro ke l'ekiranta prima ministro Jose Maria Aznar
projetis tardigar l'elekto.
EU e Kanada atingas komerco-konkordo
EUOBSERVER/BRUXELLES - L'EU e Kanada hiere konkordis pri plufortigar
komerco- e koloko-ligi.
Irlandana prima ministro Bertie Ahern (la nuna EU-prezidanto),
Komision-prezidanto Romano Prodi ed exterlandala chefo Javier Solana,
renkontris la Kanadana prima ministro Paul Martin hodie en Ottowa.
Sr Martin renkontris unesmafoye EU-dukteri depos sucesar Jean Chretien
kom prima ministro lastavintre. Lore on spekulis ke Sr Martin naturale
enfokigos plu multe relati kun Usa kam kam kun Europa kompare Sr
Chretien - konocita kritikero di Washington.
La politiko dil klozita pordo
Le Roma di Slovakia vidas unesmafoye sua posibla futuro kom
EU-civitani.
En januaro, l'Europana Komisiono kontre Rasismo e Netoleremeso (ECRI)
editis sua triesma raporto pri Slovakia. La raporto konkluzis "la
Roma-minoritato restas severe desavantajizita en maxim multa domeni dil
vivo, partikulare en la domeni di hemi, employeso ed eduko". Tale, la
proklamita skopo di plubonigar la stando di le Roma "ne tradukesis ad
adequata resursi e koncentro di intereso dal omna administrala faki".
Pos kelka semani, Slovakia eniros l'Europana Uniono. Respekto a homala
e minoritatala yuri esis olim importanta postulo por adherar l'EU, ma
hodie plu su-egardanta Uniono semblas poke suciar pri le Roma di
Slovakia e lia kompani en l'altra landi di Central ed Estana Europa.
Lastayare, l'Europana Komisiono atingis tre simila konkluzi, asertante
en sua reguloza raporto pri Slovakia ke la Roma-minoritato subisas
frequa neyusteso, inkluzante legala, e ke lia ekonomiala stando
diferegas kam ta dil majoritato-populo. La lasta raporto, tamen, ne
mencionas la stando di le Roma. Forsan on kredas ke lia stando future
pluboneskos konseque l'efekto di EU-integresko ye la Slovaka ekonomio e
socio.
Prezidanto dicas ke Polonia 'trompesis' pri Irak-milito
Prezidanto Aleksander Kwasniewski dicis a grupo de Franca jurnalisti
en Warszawa 18ma marto ke Polonia "trompesis" a kredar ke Saddam
Hussein posedis armi amas-destruktiva ante milital interveno en Irak
ante un yaro.
"Esas vera ke, pri armi amas-destruktiva, ni trompesis.
Ni duktesis aden eroro", Kwasniewski citesis da PAP. Kwasniewski
adjuntis ke tamen l'ektiro di Polona soldati de Irak esus neutila.
"Ni es meze di marto, e me questionas: Se l'ektiro di soldati implikus
la retroveno di milito, etnala purigo ed ataki kontre vicina stati,
quo esus la senco di tal ektiro?" il dicis, segun PAP.
Se ... la situaciono ne pluboneskos
BBC-programo predicas la posibla konsequaji di kreskanta neegaleso en
Britana socio.
En 2014, la lakuno inter le richa e le povra es plu larja kam irgatempe
depos la duesma mondo-milito, ed ol plularjeskas. Dum ke rankoro
augmentas ye amba lateri dil povreso-divido, kad irga guvernerio povas
diminutar la lakuno?
"Ol divenas tre polarigita socio, quaze apartheid di le richa
e le povra", dicas Will Hutton, ekonomikisto ed autoro di 'The State
We're In'.
Pos dek yari, en 2014, Britania es profunde dividita socio. Multa de
ni es plu richa kam hodie, ma la lakuno inter le richa e le povra
kreskis til grado ne vidita depos la duesma mondo-milito.
La havanti e nehavanti vivas sempre plu separite, e la havanti volas
protektesar kontre la nehavanti.
3ma Berlin-Biennale pri aktual arto
La 3ma Berlin-Biennale pri aktual arto eventas de 14ma
februaro til 18ma aprilo 2004.
KW-Instituto pri Aktual Arto en Berlin-Mitte, partenero dil
Berlin-Biennale depos olua komenco en 1998, itere provizos
expozo-spaco por la 3ma Biennale en 2004. Kun la
Martin-Gropius-Bau en Berlin-Kreuzberg duesma, internacione
establisita expozeyo nun unesmafoye disponesas por la 3ma
Biennale.
La film-programo dil 3ma Berlin-Biennale pri Aktual Arto
konsistant ek 30 cinemala verki expozesos che Kino Arsenal proxim
Potsdamer-Platz.
Per l'unesma Biennale en 1998 unika, internaciona evento por
Germania establesis. La projeto, eventante reguloze en Berlin, vizas
reaktar developi en l'urbo. E la respondo del jurnalaro e la nombro
de vizitanti al unesma e duesma Biennale, amba kun 60.000
interesata spektanti de Germania ed exterlando, atestas la signifiko
dil evento pri aktual arto.