Franca autoro qua dicis ke Disney kopiis karaktero lua en 'Serchante Nemo' perdis korto-lukto por impedar la vendo di film-vari en Francia.
Franck le Calvez dicis ke la titul-karaktero dil filmo, klaunfisho nomizita Nemo, similesas la titul-karaktero en lua rakonto 'Pierrot la Klaun-Fisho'.
Tamen, judiciisto judikis ke malgre la simileso dil du karakteri, li ne havas suficanta similesi. La libro da Le Calvez, pri fisho serchanta sua familio, editesis en 2002. Il dicas ke il registragis l'ideo che Franca kopiyur-oficisti en 1995, e transformis ol aden libro por probar vendar l'ideo a film-firmi.
Tamen, Disney-advokato Magali Thomas dicis ke la firmo projetabis la Nemo-karaktero ja en 2000, du yari ante l'edito di la libro da Le Calvez.
George Michael refuzas muzik-industrio
Pop-kantisto George Michael abandonas la muziko-komerco por
publikigar sua kansoni enrete gratuite vicee.
Fanatiki havos la posibleso donacar enrete kambie deskargo di kansoni,
e la profiti donesos a karitati. Il reklamas sua maxim recenta
albumo 'Patience', segun il sua lasta.
Parolante pri la decido, la 40-evanta stelo dicis: "Me es certa ke lo
es senprecedenta, certe por ulu qua ankore vendas diski. Me esis tre
bone pagata pro mea talenti dum la yari do me vere ne bezonas la
pekunio dil publiko."
Il adjuntis ke il esperas ke ti qui deskargas lua muziko donacos a
lua favorata karitati.
Verheugen kritikas EU-stati pro manko di debato pri plugrandesko
EUOBSERVER/STRASBOURG - EU-guvernerii ne suficante informas civitani
pri plugrandesko e la nova EU-civitani konseque subisas restrikti ye
sua movado cirkum l'Uniono - to esis la mesajo hodie de un ek la
precipua arkitekti dil projeto.
Plugrandesko-komisionano Günter Verheugen hodie kritikis la
stato-guvernerii dil EU pro ne informar sua civitani pri
EU-plugrandesko, dum ke EU-stati demarshis por restriktar aceso a la
labor-merkati kelka semani ante 1ma mayo. "Esas certena desquieteso
quo akompanas ica plugrandesko", Sr Verheugen dicis icamatine en
l'Europana Parlamento - ol produktis timi pri enfluo di migranti del
plu povra adheranti al EU.
Ni ne povas klozar nia okuli al fakto ke nur nun esas profunda debato
pri EU-plugrandesko en la membro-stati. Me dicis dum yari ke ni
bezonas la susteno da nia civitani en ca procedo, esas nun tro tarda
ye 11 kloki", il adjuntis.
La granda majoritato dil membro-stati dil EU anuncis ke li intencas
restriktar movado di civitani de central ed estana Europa - multi
agante tale pos interna preso. La landi qui enduktas labor-barili
pregesas sorgoze studiar reala migro-shabloni ed abolisar ta barili
kontre libera movado tam balde kam posibla.
Observeri kondamnas Rusa elekto
La Rusa prezidantal elekto faliis atingar demokrata normi, segun
Europana elekto-observeri.
La voto sundie ne satisfacis kriterii "necesa por sana demokrata
elekto-procedo", dicis chef-observero Julian Peel Yates en Moskva.
Observeri del Organizuro por Sekureso e Koopero en Europa (OSCE) e la
Konsilistaro di Europa partoprenis la misiono.
Prezidanto Putin ganis plu kam 70% dil voti. Pos lua vinko, il vovis
durar ekonomiala reformi e dicis ke il sekurigos demokratio.
Che novaj-konfero en Moskva, Sr Yates kritikis la rolo dil statala
komunikili ante l'elekto. "Esencal elementi ... quale vivaca politikal
diskuto e sencoza pluralismo mankis", il dicis.
Hispania minacas ektirar soldati de Irak
La socialista prima ministro elektita di Hispania dicas ke il ektiros
soldati de Irak - se l'UN ne direkteskos.
Jose Luis Rodriguez Zapatero dicis: "La milito en Irak esis dizastro,
l'okupo di Irak es dizastro." Il advokis grand internaciona alianco
kontre teroro e fino di "unlatera militi".
La socialisti vinkis astonante pos ke voteri semblis turnar su kontre la
guvernerio pri olua trakto dil Madrid-bombi qui ocidis 200 homi.
Hispania sustenis l'Usana milito kontre Irak malgre multa interna
opozo. Ol nun havas 1.300 soldati en la multanaciona armeo en la
central-sudana sektoro.
Che novaj-konfero en Madrid, Sr Zapatero dicis ke sua prioreso esos
"sistemala lukto kontre terorismo omnaspeca". Sr Zapatero dicis ke
prezidanto Bush e prima ministro Blair bezonas "su-kritikar" pri sua
decido invadar Irak.
Vuillard: de pos-impresionisto a moderna maestro
Prizento dil expozo pri piktisto Édouard Vuillard, che la Rejal
Akademio en London, til 18ma aprilo.
Édouard Vuillard (1868-1940) apartenis la generaciono di yuna,
experimental artisti qui duktis Franca arto. Il vivis e laboris en
Paris dum la tarda 19ma e frua 20ma yarcenti.
Vuillard employis intensa kolori e simpligita formo en sua frua
pikturi. Apud sua amiko, Pierre Bonnard, il esis un ek la precipua
praktikeri di Intimismo - intima domala genre-pikto.
Maestro di pikto-tekniko, la verki da Vuillard es karakterizata da lua
uzo di koloro ed emfazo sur surfaco-shablono ed orno.
Ica expozo prizentas la remarkinda diverseso dil verki da Vuillard. Ol
inkluzas pikturi, teatraji e granda ornala paneli. Plu kam 200 verki
montras la developi dil verki da Vuillard del
fin-de-siècle til la 1930a yari. Ica expozo anke
montros selekturo del intima fotografuri quin Vuillard facis di sua
familio ed amiki.
Frua printempi divenas 'normala' en Britania
L'efekti di klimat-chanjo implikas ke Britani augmentante aceptas la
frua arivo di printempo, segun ciencisti.
Li kredas ke homi sempre plu multe kustumas vidar printempo-flori lor
la yarkomenco, ed altri signi di varma vetero plura semani plu frue kam
ordinare.
Lansante Nacionala Cienco-Semano, li dicis ke la frua arivo di printempo
montras la kreskanta konfundeso di Naturo. Li anke pregis ciencisti
invitar homi diskutar la temi qui desquietigas li.
Polonia stacas ferme pri Irak
Prima ministro Leszek Miller dicis 15ma marto ke Polonia mantenos sua
kontributajo di 2.400 soldati en Irak.
Miller reaktis la sugesto samdie da Hispana prima ministro elektita
Jose Luis Rodriguez Zapatero ke Madrid ektiros sua 1.300 soldati ek
l'armeo di 9.000 soldati duktata da Polonia en Irak ante 30ma junio sen
UN-rezolvuro.
Miller dicis ke tal ektiro povus perceptesar kom febleso afronte teroro
pos la bomb-ataki lastasemane en Madrid. Prezidanto Aleksander
Kwasniewski dicis 16ma marto ke se Hispania decidos ektirar soldati de
Irak, Polonia ne sendos plusa soldati por plenigar la lakuno. "Ni
laboras segun projeto, e ni ne povas chanjar ol diope e sendar soldati.
Li ne es pronta, honeste", Kwasniewski dicis.
Samtempe, la dextrana opozo Ligo di Polona Familii anuncis ke ol balde
submisos klado-propozo al Sejm pri plebicito samtempe kun
Europana elekto en junio pri la Polona militala partopreno en Irak.
Projeto vizas liquidigar la glacio sur Europa
Resercheri probas teknologio quo povus kapabligar probilo liquidigar la
glacio-surfaco di Europa, satelito di Jupitero, por atingar la
aquo-oceano sube.
Spaco-ciencisti volas sendar probilo al Jupiterana satelito pro ke olua
oceano forsan, teorie, sustenar vivo. Pos penetrar la glacio-strato,
di dikeso 10-30 kilometri, la probilo povus analizar l'aquo por
establisar kad ol kontenas vivanta enti.
Ma signifikanta obstakli restas ante sendar la probilo dal Germana
Aerospaco-Centro ad Europa. "L'ideo es adherar Europa ed ulmaniere
penetrar la glacio", Dr Stephan Ulamec dil Centro dicis. "On bezonas
ulsorta liquidiganta probilo quo penetros la glacio ed exploros la
liquida oceano sube."
Segun
BBC News Online
Germana Aerospaco-Centro