Ol es diala rutino che milioni de Italiani - la matinala taso de kafeo preparita en la koqueyo o pardrinkata rapide en kafeerio survoye a la laboreyo.
Ma dum yari lia favorata maniero komencar la jorno havis mala reputeso - maxim recente kande on raportis ke mediki rekomendis al britana prima ministro Tony Blair drinkar min multa kafeo.
Nun semblas ke lo chanjas. Ignorez la timiganti, dicas dietisto Chiara Trombetti, dil instituto Humanitas Gavazzeni en la nordana Italiana urbo Bergamo. Kafeo povas helpar onua saneso - el dicis - e kam plu forta, tam plu bone. Pro to el rekomendas espresso vice tre ne-Italiana taso de pudro-kafeo.
Dr Trombetti dicas ke el ipsa odias kafeo - ma indikas multa ciencala evidenteso. Kafeo kontenas tanino ed antioxidigivo, qui helpas la kordio ed arterii, el dicas. Ol povas alejar kapdoloro. Ol helpas la hepato e povas helpar preventar ciroso. E la kafeino en kafeo povas diminutar la risko di astmo-ataki.
Ma kafeo ne helpas omnu. Drinkar tro multa povas augmentar nervozeso e produktar rapida kordio-pulso e tremanta manui. E mem Dr Trombetti dicas ke nulu devas drinkar plu kam tri o quar tasi singladie.
Kin Britani en Guantanamo iras adheme, kun futuro necerta
LONDON (Reuters) - Kin Britana viri enkarcerigita dum plu kam du yari
che l'Usana Guantanamo-bazo en Kuba iros adheme mardie - pozante dilemo
a polico kontre-terorista pri ka liberigar li o retenar li en
karcero.
La kino, en Guantanamo depos tarda 2001 o frua 2002 kun plu kam 600
altri suspektata pri luktar por le Taliban en Afganistan o sustenar
al-Kaida, expektesas flugar aden militala bazo proxim London cirkume
7 pdm.
Polico nemediate arestos li, ma se on decidas ke esas nula kazo
kontre li segun la severa legi kontre-terorista di Britania, on forsan
liberigos li pos kelka dii, segun legala fonti.
"Me ankore ne povas esar kontenta pro ke me ne savas quo eventos nexte",
Sharon Fiddler, fratino di retrovenanta karcerano Jamal al Harith, dicis
a Reuters de sua hemurbo Manchester. "Me fratulo devas nun rihavar sua
vivo."
Hungaria replikos laboro-restriki dal EU
La prima ministro di Hungaria konfirmis ke sua lando respondos simile
laboro-restrikti impozota da nuna EU-membri sur Central Europana
laboristi.
"Ico es precipue decido di egala rango", Peter Medgyessy dicis.
La 15 nuna membri dil EU, timante migr-ondo pos l'expanso di 1ma mayo,
demarshas por restriktar aceso a sua labor-merkati.
La restrikti ne aplikesos al non landi qui adheros l'EU samtempe kam
Hungaria.
Sr Medgyessy konfirmis la decido jovdie. "Hungaria es fiera pri sua
valori e sua savo", il dicis.
La lando havas chomado-nivelo di 5,8%, kompare kun la mezvalora
EU-nivelo di 8%.
Beagle-decenso posible tro rapida
La probilo Beagle 2 forsan destruktesis sur Marso pro ke
l'atmosfero esis min kam expektite densa.
Mision-ciencisti informis renkontro en London ke la probilo forsan
simple voyajis tro rapide e la parafalo ed aersaki e ne povis certigar
mola koliziono.
La konfero dil Rejala Societo anke audis ke fotografal evidenteso
trovis quar brilanta marki, referata kom la "filo de perli", sur la
surfaco dil planeto.
Ciencisti studias l'imaji por saveskar ka li es la restaji dil probilo.
Li volas savar ka la marki es l'aersaki e parafalo dil probilo o nur
rezulto dil imaj-procedo. La Beagle-esquadro, duktata da
Profesoro Colin Pillinger, informis la societo ke la lasta es probable
vera.
EU-civitani deziras komuna enmigro-politiko
EUOBSERVER/BRUXELLES - Dum ke guvernerii en l'EU disputachas pri quale
e ka konkordar komuna EU-politiko pri azilo ed enmigro, semblas ke la
deziro di lia civitani es plu klara.
Segun inquesto editita da Eurobaromètre, 56% opinionas ke on
bezonas ekonomial enmigro dum ke 66% volas egala yuri por legal
enmigranti.
Membro-stati probis dum plura yari konkordar komuna politiko e la granda
majoritato di guvernerii decidis restrikar aceso a labor-merkati por
civitani di Central ed Estana Europa.
Civitani es mem plu certa pri azil-aferi - 85% di inquestiti volas
komuna reguli pri azilo. Komision-oficisto prizentante la rezulti dicis
"Ni es kontenta pri la rezulti" adjuntante ke li generale similesas lo
expektita da Bruxelles.
Malgre la deziro di sua civitani, guvernerii til nun ne povis vinkar sua
deskonkordi qui tushas omnasorta nacional interesti. Entote plu kam
7.500 studenti questionesis dum decembro lasta.
Bolkestein dicas ke Turkia devas restar exter EU
Dum ke Turkia vartas decido en decembro pri komencar diskuti pri adhero
al EU, Nederlandana komisionano Frits Bolkestein dicas ke la lando devas
restar extere.
La komisionano anke opinionas ke "Ukrainia es plu europana kam Turkia".
En sua nova libro 'La Limiti di Europa', Sr Bolkestein dicas ke Turkia
devas esar "bufro" protektante Europa kontre Siria, Iran ed Irak.
Simila kuseno inter l'EU e Rusia povus formacesar dal republiki di
Moldova, Belarus ed Ukrainia, qui anke devas restar exter l'EU.
"Este, esas geopolitikal bezono a bufro-zono inter l'EU e Rusia, quo
povus formacesar da ta landi qui apartenas nula bloko", Sr Bolkestein
skribis.
Sen mencionar Turkia direte, il anke dicas ke simila bufro esus anke
avantajoza "por protektar l'Uniono kontre Siria, Iran ed Irak".
L'Europana Komisiono rekomendos en oktobro kad adhero-negocii kun
Ankara devas komencar. La decido facesos da EU-statestri en decembro.
Nutrivo-pakajo 'kustas £15 bilion'
Supermerkato-klienti en Britania spensas £470 singlayare - sisimo di sua
nutrivo-budjeto - ye pakajo, raporto sugestas.
La Liberala Demokrati questionis la non maxim granda supermerkato-kateni
en Britania pri paki, disipo ed energio-uzo. Li trovis ke klienti
spensas £15 bilion ye pakajo singlayare, e ke livro-kamioni voyajas
l'equivalanto di du retrovoyaji a la luno singladie.
Lia raporto 'Quante Verda Es Vua Supermerkato?' demandas diminuto di
kamion-vehado ed uzo di biodekadiva saki.
La raporto rekomendas 26 chanji, inkluzante:
Tren-explozi en Madrid ocidas 173
MADRID (Reuters) - Samtempa explozi ocidis 173 homi e vundis centi en
plena treni en Madrid jovdie en pre-elekta ataki nomizita la maxim
sangoza "teror-ago" dum la recenta historio dil Europana Uniono.
Esis nula nemediata responso-klamo, ma Hispania insistis ke la Baska
separista grupo ETA responsas pri la 10 explozi che fervoyo-stacioni
trans Madrid.
Ol refuzis sugesti ke l'ataki esis da Islamana militemi qui iracas pro
la susteno da Hispania por l'Usana milito en Irak.
"Ol es la maxim mala teror-ago dum la historio di Hispania e la maxim
mala dum la recenta historio di irga stato dil Europana Uniono",
Prezidanto dil Europana Parlamento Pat Cox dicis al shokita asemblo.
ETA (Euskadi ta Askatasuna) ocidis cirkume 850 homi depos 1968 dum sua
lukto por Baska sendependeso. L'Interna Ministerio dicis ke 173 homi
mortis pro explozi che la staciono Atocha en centrala Madrid, la
staciono El Pozo en sudana Madrid e triesma che Santa Eugenia.
Oficisti dicis ke esas 600 vunditi.
Film-direktisto DeLeo deskriptas 'Chernobyl Heart' kom sua
maxim desfacile facebla filmo
Maryann DeLeo es sendependa Usana film-direktisto, di qua la
dokumentalo 'Chernobyl Heart' (Chernobyl-Kordio) recente ganis
Akademi-Premio di maxim bona kurta dokumental-filmo.
La filmo enfokigas la sufrado di pueri en Ukrainia, Belarus e parti
di westana Rusia qui expozesis a radii del nukleal acidento en 1986
en Chernobyl, Ukrainia. RFE/RL recente parolis kun DeLeo telefone e
questionis el quale el sentis su pri ganar la Oscar.
"Sorto di miraklo. Esas marveloza. Ica ne es facile spektebla filmo
pro ke esas tanta malada pueri qui es tre desfacile regardebla. Me
nultempe kredis ke irgu volos spektar ol. E la fakto ke on suciis, e
la fakto ke l'Usani e l'Akademio votis por ol, me trovas lo bela
miraklo. Me es tante felica."
Lore on questionis DeLeo quale el unesme pensis pri l'ideo pri facar la
filmo. "Retrospektante, me vere kredas ke esis ula destino ibe. Amiko
mea vizitis l'Unionita Nacioni e regardis expozo organizita da Adi
Roche e la Chernobyl-Projeto por Pueri. Mea amiko tante iracis pri
to quon il vidis pro ke il kredis ke omno obliviabis pri Chernobyl.
Pro ke il ne savis ke co eventas. Il sendis me por regardar l'expozo,
e lore altru dicis a me, ho, vu devas facar filmo. E lore la pordo
aperteskis. Me vere sentas ke lo ne esis me. Me esis guidata. E
tale lo eventis."