La mondo mustos selektar inter problemi quale finar hungro ed afrontar klimat-chanjo pro ke ol ne povas solvar omna samtempe, Dana skribisto pri ambiento dicas.
La Dana autoro Profesoro Bjorn Lomborg dicas ke la mondo mustos facar desfacila selekti por afrontar sua problemi.
Profesoro Lomborg, qua ante tri yari skribis La Skeptika Ambientisto, dicas ke ne esas suficanta pekunio por facar omno.
Il dicis a BBC News Online ke il opinionas ke la richa landi devas spensar plu multo por finar povreso e protektar l'ambiento.
Il aranjas konfero en mayo desegnita por decidar qui ek la 10 urjanta global problemi devas esar prioresi.
Profesoro Lomborg, direktisto dil Dana Instituto di Ambient-Evaluo, invitis non eminent ekonomisti, quar ek li ganinti di Nobel-premio, al konfero, titulizita Copenhagen Consensus 2004. Ol eventos en la Dana chefurbo.
Li diskutos la 10 esencal problemi selektita da Profesoro Lomborg: klimat-chanjo, infektiva morbi, konflikti, eduko, financal nestabileso, guverno e korupteso, malnutreso e hungro, migro, sanigo ed aquo, e subvencioni e komerco-barili.
On esperas ke la listo selektita adoptesos da politikisti e decideri cirkum la mondo.
Nula Chipro-konkordo ante 1ma mayo, dicas Denktash
La Turka Chiprana duktero Rauf Denktash dicis ke esos nula konkordo por
riunionar Chipro ante adherar l'EU 1ma mayo.
Pos la lasta diskutado kun sua Greka korespondanti Sr Denktash
deskriptis la nociono ke konkordo esos facebla ante mayo kom
"fantazio".
Samtempe l'Unionita Nacioni duras koordinar diskuti qui vizas ke la tota
insulo eniros l'EU ye la dio referata kom E-Dio - 1ma mayo.
Lua komenti riafirmos ke la longe-servanta duktero poke atencas
internacione-sustenata temp-limiti.
Diskuti lastayare qui vizis solidigar konkordo krulis pos ke Sr
Denktash ekmarchis.
Chipro es dividita depos 1974.
Tri angla futbalisti arestita en Hispania
Tri futbalisti dil angla klubo Leicester City sendesis lastavespere a
Hispana karcero dum ke on exploras alegi ke li sexuale asaltis tri
turisti.
Keith Gillespie, 29, Paul Dickov, 32, e Frank Sinclair, 33, arestesis
en Cartagena.
Britana oficisto dicis ke l'alegi inkluzas "sexual asalto kun penetro,
quo implikus rapto."
Tri altra ludisti di Leicester City, Matt Elliot, 35, Lilian Nalis, 32,
e James Snowcroft, 28, qui akuzesas pri eniro per forteso a
hotel-chambro en La Manga, grantesis "provizora libereso".
Segun Daily Telegraph, London
Trichet: Nova membri provizos granda kontributo a kresko en EU
EUOBSERVER/BRUXELLES - La prezidanto dil Europana Central Banko (ECB),
Jean-Claude Trichet, ne kustumas emisar optimista aserti. Fakte,
parto di lua rolo es expresar su tam neutre kam posibla pri ekonomial
eventi, revelante nulo quo povus shokar la merkati.
Ma hodie, Sr Trichet esis nekustumale fervoroza pri la predici pri
plugrandesko. Il dicis ke la nova EU-membri provizos "granda
kontributo a kresko" en l'EU e ke adhero generale es "absolute
ecelanta" developo en la historio dil EU.
Il anke konfirmis ke l'ECB spensas signifikanta tempo analizante
l'efiko dil futura membro-stati ye l'ekonomio dil EU. "Ni konsakras
inter quarimo e triimo di nia tempo a ganar plu bona e profunda
kompreno" [dil nova ekonomii], il dicis.
Tamen, il riemfazis ke l'adheronta landi ne devas hastoze adoptar
l'euro.
Kande George Michael dineis che le Blair
Ante la britana elekto di 1997, pop-muzikisto George Michael invitesis
dinear che la London-hemo di le Blair. Nun il revelas sua impresi pri
ta renkontro.
Il ne volas revelar qui esis la cirkume ok altra gasti - "Me ne volas
kritikar homi. Ma me opinionis ke il esis bona homo, tre afabla.
Ka persuadiva e karismoza? No. Kande me livis, tri kozi desquietigis
me. Un esis ke kelka religiala vorti aparis en la konverso lor neexpektita
instanti. Duesme, dum ke me livis, Cherie dicis: "Ho, montrez ad il
vua gitaro, montrez ad il vua gitaro!" E me pensis: "Ho, ne montrez a
me vua gitaro, me projetis votar por vu!". Lore il apertis la
latrin-pordo ed esis ibe mikra gitaro. To desquietigis me nur pro ke
me savas ke nia egi havas ulo komuna. E me savas ke mea ego bezonas
frapo reguloze."
"Ma to quo maxim desquietigis me es ke il ne semblis esar la maxim
inteligenta homo cirkum la tablo. On volas ke la prima ministro esez
la maxim inteligenta homo cirkum la tablo, ka ne? Pro to mea tota
impreso [dum l'Irak-afero] esis ne "mentiero, mentiero" ma
"bone-intencanta folo". E ni devas evitar bone-intencanta foli."
George Michael esis interviuvata dal Daily Telegraph, London
La Blair-programo por atakar terorismo
Tony Blair venerdie propozis chanjo di internaciona lego por
legitimigar anticipala milital atako kontre malicoza stati qui
developas armi amas-destruktiva, kooperas kun teroristi o traktas
brutale sua populo.
Il dicis ke la "global minaco" de Islamana extremismo e global
terorismo implikas ke on devas nun ripensar la yarcenti-anciena
regulo ke la sola klara kazo por armizita interveno es "su-defenso
responde atako".
Dum diskurso en sua politikala hemurbo Sedgefield, Sr Blair dicis ke
esas lua devo, malgre la domajo a lua reputeso, expozar la minaco a
Britania e la cetera mondo de global terorismo. Il emfazis la
desfacila decidi quin il mustis facar por protektar nacional
sekureso.
Segun Daily Telegraph, London
Somero di 2003 la maxim varma depos 500 yari
Europana reserchisti dicas ke lasta somero esis la maxim varma en la
kontinento depos adminime kin yarcenti.
"Kande on konsideras Europa entote, ol esis certe la maxim varma", dicis
Juerg Luterbacher dil Universitato di Bern, Suisia.
Segun la studio, editita dal casemana jurnalo Science, Europana
vintri anke pluvarmeskas.
Mezvalora vintrala e yarala temperaturi dum la lasta tri yardeki esis
la maxim varma depos 500 yari, ol dicas.
Sr Luterbacher e lua esquadro kolektis datumi de cirkum Europa por
analizar la temperatur-historio dil kontinento.
Lia informo inkluzis datumi de arboro-ringi e sul-extraktaji del yaro
1500.
La maxim evoza viro dil mondo mortas evante 114
La Hispano agnoskita dal Guiness-Libro di Rekordi kom la maxim
evoza viro en la mondo mortis sur la Balearik-insulo Menorca.
Joan Riudavets Moll, qua festis sua 114ma aniversario ante tri monati,
mortis venerdie pos sufrar pro kataro dum plura dii.
Sr Riudavets mortis en sua hemo en Es Migjorn Gran - la sama vilajo ube
il naskis ye 15ma decembro 1889.
Il opinionis ke sua longa vivo debesis a sua Mediteraneana dieto,
fondita sur tomati, fisho ed oliv-oleo.
Greka socialisti perdas la povo
La Greka konservema partiso ganis la povo lor la general elekto,
ekpulsante la socialisti pos regno di plu kam yardeko.
Pos preske omna voti, la partiso Nova Demokratio di Costas Karamanlis
ganis cirkume 46% kontre 40.5% dal Pasok-partiso di George
Papandreou.
Sr Karamanlis agis nemediate por alejar timi ke la 2004-Olimpiado
en Athina ne esos pronta en agosto.
"L'Olimpiado esos le maxim bon e sekura", Sr Karamanlis dicis. "Grekia
montros sua moderna vizajo."
Mem ante sua vinko-diskurso, il renkontris la chef-organizero dil
Athina-Olimipiado, Gianna Angelopoulos, por diskutar strategio por finar
projeti ante agosto.
Sr Karamanlis anke aklamis la Greka decido ekpulsar la socialisto. "Lo
es nova komenco por omna Greki", il dicis dum sua unesma
televizion-diskurso kom prima ministro-elektita.