L'europana spaconavo lansesis sucesoze e nun voyajas aden spaco sur sua audacoza voyo chasar ed adherar kometo.
La £600m (900m euri) probilo acensis 0717 GMT de sua lans-platformo en Kourou, Franca Guiana an Ariane 5-projektilo pos tardigo di du dii pro disputo.
Rosetta es preparita por 7 bilion km voyajo a kometo 67P/Churyumov-Gerasimenko.
La probilo separesis del Ariane-projektilo e livis Ter-orbito vers la fora solala sistemo.
"Rosetta es parto di nia sercho a savo e nia revi. Enorma ciencala komuneso konsakris yari de laboro a ca dio", dicis Jean-Jacques Dordain, direktisto-generala dil Europana Spac-Agenterio (Esa).
Parolante a ciencisti asemblinta che mision-direkteyo en Kourou, Prof.
David Southwood, la cienco-direktisto che Esa dicis:
"Ni nun havas plusa misiono en spaco. Ni havas dek yari avan ni ed omnu
qua kontributis por atingar ica punto sentas su tre bone."
Kande en orbito cirkum la montoza bulo di glacio e polvo en 2014, la navo sendos mikra probilo al surfaco dil kometo por studiar olua kemio.
Francia 'protektas' Aristide en Central Afrikan Republiko
Paris (Reuters) - Francia dicis mardie ke ol "protektas" olima Haitiana
prezidanto Jean-Bertrand Aristide en lua provizora exilo en la Central
Afrikan Republiko ma insistis ke ol ne direktas lua movi ibe.
Aristide alegis ke on koaktis il livar l'olima Franca kolonio kontre lua
volo da Usa, kun quo Francia laboris proxime pri la Haiti-krizo.
L'alego negesis dal Bush-guvernerio kom sensencajo. "Nuntempe, me dicus
ke ni protektas, ne enkarcerigas il", Franca Defens-Ministro Michele
Alliot-Marie dicis a Europe 1-radio.
"Francia ne direktas lua agado", el dicis, remarkigante ke trupo de
Franca soldati esis en la povra lando depos militala coup
lastayare.
"Ico es nur questiono di certigar ke lua provizora resto en la Central
Afrikan Republiko eventas en normal kondicioni", el dicis. El ne dicis
ube on expektas Aristide irar nexte, o kande.
Polonia indikas Konstitucion-kompromiso
Polona deputita exterlando-ministro Jan Truszczynski indikis ke Polonia
es forsan pronta diskutar kompromiso pri la vot-sistemo en la futura
EU.
Dum kunveno dil Verda grupo dil Europana Parlamento en Warszawa, Sr
Truszczynski dicis ke Polonia es pronta diskutar chanji dil
Nice-konkordo.
Ico interpretesas kom molesko dil atitudo di Warszawa nam la Polona
guvernerio til nun insistis ke la vot-sistemo segun la Nice-konkordo -
quo avantajizas Polonia - mustas konservesar.
Pro ca problemo la diskuti pri la klado-Konstituciono krulis
lasta-decembre.
Un del kompromis-ofri dal Polona guvernerio es kalkulo di nacionala
voti en la Konsilistaro per "la quadrata-radiko dil habitantaro" di
singla lando, pluse dividenda per certena faktoro.
Segun Sr Truszczynski, ica opto esus plu favoroza a mikra e mezgrandesa
EU-membri.
Blair 'milito-krimini' kazo iniciita
La Internaciona Kriminal Korto en Den Haag pregesas explorar alegi pri
milito-krimini da Tony Blair, Jack Straw e Geoff Hoon.
La klami koncernas la rolo di Britania en invadar Irak e facesis dal
grupo Legal Agado Kontre Milito.
Li dicas ke "precipua alego" es "intence iniciar atako savante ke ol
produktos vivperdo o vundo di civitani".
Michael Mansfield QC dicis ke la grupo volas riestablisar la regno di
lego.
Ultre la prima ministro, exterlando-ministro e defens-ministro, la
grupo anke vizas chefa judiciisto Sinioro Goldsmith, qua konsilis ke la
milito esis legala.
Sr Mansfield dicis ke nula motivi ofrita por la milito - armi
amas-destruktiva, violaco di rezolvi dal Unionita Nacioni e forigar
Saddam Hussein - provizas satisfacanta legala bazo por atakar Irak.
La Internaciona Kriminal Korto (ICC) ne darfas judikar ke nelegal atako
esis milito-krimino, il dicis a novaj-konfero.
Ma il duris: "Mem se ICC decidus ke la milito esis legala, li mustus
tamen examenar ka lo entraprezita esis proporcionala."
Gibraltar-chefo sustenas Britana regno
La chefa ministro di Gibraltar parolis pri la deziro di sua populo
restar Britana che kirko por markizar 300 yari di britana regno.
Peter Caruana dicis al asemblo che St Clement Danes-kirko en London ke
Gibraltarani "deziras restar parto dil Britana familio."
Konservema duktero Michael Howard e Labour-sinioro Baronino Symons
diskursis a centi de gasti.
La suvereneso dil Roko restas forte kontestat afero.
Sr Caruana dicis al asemblo: "Ni aprecias e volas retenar nia ligi kun
Britania."
"Ni volas respektar nia vicino, Hispania, ma Gibraltarani volas restar
parto dil Britana familio."
Parolante pos l'evento, il dicis a BBC News Online: "On mustas respektar
la deziri di Gibraltarani. Li votis granda-majoritate por restar
Britana."
"On mustar cesar vidar Gibraltar kom problemo solvenda."
Serbia: Kostunica prizentas sua guvernerio koram la parlamento
La prima ministro di Serbia, Vojislav Kostunica, prizentis hiere koram
la parlamento sua programo guverneriala. Prizentante su kom
por-Europana il volas samtempe restriktar la koopero da Belgrade kun
la Internaciona Kriminal Korto en Den Haag.
La parlamento fido-votas hodie al nova guvernerio di qua la prima
ministro, Vojislav Kostunica, prizentis hiere programo quo egardas la
diversa susteni quin il bezonas por obtenar ica fido, quale la Partiso
socialista di Slobodan Milosevic, la SPS.
Dum sua diskurso koram la parlamento, la prima ministro asertis ke
integresko Europana es la sol alternativo. "Serbia kreos strategio
nacionala di proximesko vers L'Europana Uniono" afirmis Vojlslav
Kostunica. Ico kelkete quietigos l'Europana Uniono desquietigita dal
influo dil SPS asociata kun l'etnala purigo dum la Balkan-militi.
Akademio Hungara di Cienci: Esperanto es linguo vivanta
Esperanto es linguo vivanto. Tale konkluzas l'Instituto Linguistikala
dil Akademio Hungara di Cienci.
"Pos plurayara lukto l'Esperantisti Hungara sucesis igar Esperanto
agnoskata kom linguo vivanta", jus deklaris Oszkar Princz,
sekretario-generala dil Asociuro Hungara di Esperanto. E pluse:
"Esas nedicenda ke uzeri di Esperanto nultempe dubitis ke ca linguo -
artificala, projetita dekomence - ante longe divenis linguo tre
vivanta."
L'Eduko-Ministerio Hungara efektive jus informis l'Asociuro Hungara di
Esperanto ke, segun deklaro dal Instituto Linguistikala dil Akademio
Hungara di Cienci, Esperanto povas de nun qualifikar kom "linguo
vivanta". Recente kelka doc-instituti dil stato ne volis konsiderar ol
kom plena linguo, samranga kun l'altri, to quo kelke frenagis doco di
ol.
Depos la yaro 1995 on konstatas fenomeno interesanta en Hungaria. Nova
lego divenis obligala, por studenti che universitati ed alt-instituti,
suceso en exameno pri stranjera linguo. Depos lore, la nombro di
studenti qui selektis Esperanto kreskegis, explikas O. Princz, til punto
ke, en 2002, Esperanto atingis triesma poziciono, dop l'angla e germana,
ma avan la franca. Tala rezulto permisas de nun propozar
Esperanto-kurso ye omna doco-nivelo.
Segun la listo Langues Vertes
Joan Miró: 1917-1934. La Nasko dil Mondo
Prizento dil expozo pri piktisto Joan Miró, che la
Pompidou-Centro en Paris, til 28ma junio.
Ica expoz-evento traktas la komplexeso dil verkaro da Joan Miró
inter 1920 e 1930, yari di intensa produkto ed invento plastika
efervecanta. Ensemblo ecelanta de cirkume 240 verki, inter qui 120
pikturi ed objekti e cento de kolaji, konstrukturi, ed inventuri
omnasorta. Okaziono por la publiko deskovrar kelka maestro-verki -
certeni needitita - inter qui multa qui ante longe livis Europa.
Granda lakuno esta-westa pri viv-qualeso pos plugrandesko
EUOBSERVER/BRUXELLES - Civitani dil nova membro-stati es multe min
kontenta pri sua vivi, havas salarii kaze dekfoye plu basa, e multe plu
mala laboro kam sua vicini en nuna EU-landi.
Ici es rezulti di nova exploro publikigita hodie kune dal Europana
Fonduro e l'Europana Komisiono.
La raporto montras ke, dum ke preske 90 procento di homi en la nuna EU
sentas "tre kontenta o pasable kontenta" pri sua vivi, nur du triimi de
homi dil nova 13 ACC-landi - la 10 nova membro-stati plus Romania,
Bulgaria e Turkia - sentas same.
Pos plugrandesko, esos enorma difero di percepti pri viv-qualeso inter
la maxim kontenta civitani e le minim kontenta, del gaya Dani (preske
100 procento de Dani es kontenta pri sua vivi) al deskontenta Latviani,
nur 50 procento de qui es kontenta pri sua vivo.
Montrante ke kontenteso ne necese relatas la richeso di lando, Malta,
Slovenia e Chipro omna havas plu kontenta civitani kam Italia o
Francia.
Ma salario certe efektas la percepto di homi pri sua feliceso e
viv-qualeso. Ek la 28 landi inquestita, la civitani di 24 rangizis
salario kom la maxim importanta faktoro qua povas plubonigar la nuna
viv-qualeso.