L'urbestro di London Ken Livingstone deklaris ke la trafiko-tarifo es suceso, lor olua unesma aniversario.
Il dicis ke trafiko diminutis ye 18% e tardigi diminutis ye 30%.
La tarifo di £5 esis enduktata por ti qui travehas ok-quadrata-milia zono di centrala London.
La London-Komerco-Chambro demandis ceso di tarifi dum min trafikoza tempi por helpar butikisti, ma Sr Livingstone negis ke komerco sufras.
Sr Livingstone anke dicis ke l'autobuso-sistemo dil urbo "pluboneskis dramatale" kun 29.000 plu multa homi uzante la servo.
Sr Livingstone dicis: "Trafiko-tarifo esis radikal solvo di longe-existanta problemo."
"La stradi di London esis plena de lente-movanta trafiko e co kustis komerco 2 milion pundi singlasemane."
"Ico es lo sola quon me facis o kun quo me esis asociata dum 33 yari di publika vivo, quo realeskis plu bone kam me expektis."
"Malgre la malega predici ante la lanso dil skemo, la trafiko-tarifo sucesas e pro to preske 75% di Londonani nun sustenas la skemo - pro ke ol funcionas."
On expektis ke la tarifo ganos £180 milion por publika transporto, ma ol ne atingis ta evaluo. Vicee oficisti expektas ganar £68 milion cayare ed inter £80 e £90 milion nextayare.
"Ni nultempe expektis ganar pundo per ico", Sr Livingstone dicis.
Sr Livingstone ja dicis ke la grandeso dil zono forsan duopleskos se il rielektesos kom urbestro plu tarde cayare.
Steve Norris, la Konservema kandidato por London-urbestro, dicis: "La sola persono qua opinionas ke ca skemo ne nocas komerco es Ken Livingstone."
"La trafiko-tarifo reale domajas."
Latvia refuzas visto a Rusa politikisto pro linguo-problemo
Riga - Latvia refuzis grantar visto al deputita parolero dil Rusa
Duma, Dmitrii Rogozin, inter kreskanta tensi pri lego quo
augmentos uzo di la Latviana linguo en la skoli di la lando.
Parolisto che la Latviana exterlandana ministerio Rets Plesums
konfirmis la visto-refuzo, citante to quon il referis kom nevolunto che
Rogozin pri konstruktiva dialogo.
Rogozin, konocata pro lua forta poziciono pri certigar la yuri di
Rusa-parolanti en exterlando, projetis asistar kongreso di Rusa skoli
en Latvia en frua marto.
Tensi kreskis inter Latvia e Rusia pos ke Latvia recente adoptis lego
quo postulas ke 60 procento di klasi docata en la 159 Ruslingua licei
di la lando mustas esar en la Latviana linguo.
Elekti Europana: inquesto desquietanta
Segun inquesto publikigita dal Europana Komisiono, nur triimo di
Europana civitani afirmas havar ferma intenco votor lor la nexta elekti
Europana.
Segun Eurobaromètre miyara pri la stando di publika opiniono,
produktita de 1ma oktobro til 7ma novembro 2003 per selekto
reprezentiva di 16.000 homi e publikigita 23ma februaro dal Europana
Komisiono, nur 31% di civitani Europana dicas ke li intencas votar lor
l'elekti Europani nexta-junie. Esas poke plu multi, kun 35% intenci,
en la dek landi qui adheros l'Europana Uniono 1ma mayo nexta.
Eurobaromètre montras anke evidenteso di diminuto di fido al
institucuri Europana che l'inquestiti (41% kontre 44% en printempo
2003). L'Europana Parlamento es la maxim bone konocata nam 91% dil
selekto inquestita en la Westo audis pri ol e 78% opinionas ke ol pleas
importanta rolo en la vivo dil Europana Uniono. Ma samtempe 70% donis
la prima rolo al Europana Komisiono kontre 58% al Konsilistaro di
Ministri.
La Beagle-navo di Darwin 'trovita'
La misterio pri la fato dil navo qua portis Charles Darwin cirkum la
mondo es forsan solvita.
Esquadro duktata da Dr Robert Prescott dil Universitato St Andrews
trovis to quon li kredas esar la restaji di HMS Beagle sub marsho en
Essex.
Por explorar pluse ca situo, teknologio desegnita por la recenta
faliinta misiono a Mars konsideresas.
La du serchi es ligita da Colin Pillinger, qua nomizis sua navo al
Reda Planeto Beagle 2 segun olua 200-yari-evanta preirinto.
Komplexa radar-teknologio uzesis por detektar signi di ligno e metalo
quo povas apartenar al fundo di HMS Beagle, sur quo Darwin koliis la
natural specimeni quin il uzis por developar sua teorio di
evoluciono.
La restaji dil navo jacas en kin metri de fango che situo preske
Potton-Insulo.
Pos cirkumnavigar la globo, la navo uzesis kom survey-navo por kombatar
kontrabando en la Southend-Distrikto.
Resercheri mustas nun decidar kad esos posibla salvar la restaji dil
navo. Til nun, l'esquadro ne obtenis financizo por to.
Europana Komisiono dicas ke timi pri enmigranti de nova EU-membri
es senbaza
Citante studio fondita sur inquesto pri publika opiniono da
Eurobaromètre, l'Europana Komisiono dicis 26ma februaro ke timi
inter nuna membro-stati dil EU pri amas-enfluo di basa-habilesa
laboristi del 10 adheranta stati es senbaza, AFP raportis. La
Komisiono dicis ke ol plu multe sucias pri l'efiko di posibla
"cerebr-ekfluo" del nova EU-membri.
Provizora employeso-ministro Margot Wallstrom dicis ke "la nova
membro-stati provizas multe-bezonata enfluo di alta-habilesa
individui, kapabla kontributar aktive al developo dil Europana
ekonomio." Altralatere, el dicis, la studio anke montras ke "esas
grava risko di 'yuno- e cerebro-ekfluo' en adheranta landi, kun
2-3 procento dil evo-grupo 15-24 indikante ferma intenco movar" aden
nuna membro-landi dil EU.
Souad Massi: Aljerianino en Paris
Semblante povus esar nula plu fertila tero por protest-kantero kam
Aljeria. Ecepte la notinda Berber-kanteri di Kabylia quale Idir,
tamen, yardeko di infernatra intercivitana milito e brutaleso produktis
multa emocoza literaturo ma poka protest-kansoni.
La lanso di 'Raoui', la debut-albumo da Souad Massi, che Universal
France chanjis omna to. Massi naskis aden familio di artisti e
muzikisti. El studiis la klasika araba-andalusiana muziko di sua
hemlando, apud westana klasika muziko ante divergar sur sua propra
voyo dum sua yuneso. Pos periodo en flamenco-grupo Les
Trianas d'Alger, Massi fine trovis sua propra voco kom sola artisto,
kun muzikistaro Atakor.
Elua klasoza mixuro de rock, folk, chaabi (populara Aljeriana
muziko) e Nord-Afrikana radiki trovis rapid e facila suceso. Elua
parolema atitudo pri la senfina sufrado di sua hemlando tamen ganis
ombroza enemiki ed elua vivo divenis plu desfacila, aparte pos ke el
desengajesis de sua employeso kom urbo-projetisto.
Ye la solio di tota abandono, Massi invitesis al festo 'Mulieri di
Aljeria' en Paris en 1999 ed elua aparo acendis fairo di laudego
ed ecito. Mercury Records rapide signatis el e debut-albumo
registragesis produktita da Bob Coke, simpatianto famoza pro lua
laboro kun Ben Harper. La rezulto esis 'Raoui', albumo qua superesis
charti, inquesti e premii cirkum Europa e pretere.
Massi referesis kom la Tracy Chapman di Aljeria, ma on povus facile
remplasar Chapman per Joni Mitchell, Michelle Shocked o irg altra
tre talentoza kantero-kansonskribero kun penetrante honesta talento e
kurajoz anmo.
El es senprecendenta en Nord-Afrika e la doloro di Aljeria fine trovis
fitanta muzikal expreso.
Hispania anuncas superkomputoro-projeto
Hispania anuncis projeto konstruktar la duesma maxim potenta komputoro
dil mondo.
La superkomputoro povos procedar 40 teraflop - 40 trilion
kalkuli po sekundo, equivalante 18.000 personal komputori.
La sistemo esos ye la sino di centro por reserchar klimat-chanjo,
medicino ed industrial desegno.
La centro lokizesos en la richa nord-esta regiono Katalonia, la
alte-teknologiala centro di Hispania, ed inkluzos financizo di 70m euri
($87m).
La maxim rapida komputoro dil mondo es la Tero-Simulero, kreita da NEC
en Yokohama, Japonia, konsakrita a simular klimato e sismal aktiveso.
La hispana komputoro, konstruktota dum quar yari da IBM, pezos 60.000kg
ed okupos 120 quadrata-metri, segun la jurnalo El Pais.
Ol uzos la operaco-sistemo Linux, la guvernerio dicis.
"Ol esos l'unesma superkomputoro en la mondo por general uzo", ministro
di cienco e teknologio Juan Costa raportite dicis a novaj-konfero.
Il dicis ke Alzheimer-morbo, morbo di fola bovi e klimat-chanjo esos
inter la resercho-prioresi, malgre ke sendependa ciencala komisiono
fine decidos.
Pre-Rafaelista Imagino: Vereso a Naturo
Prizento dil expozo pri piktisti Pre-Rafaelista, che la galerio Tate
Britain en London, til 3ma mayo.
Ica expozo konsakresas al revolucionala metodo di peizaj-pikto enduktita
a Britania en la 1850a yari da grupo di yun artisti konocata kom la
Pre-Rafaelisti.
Ol montras quale la peizaji di John Everett Millais,
William Holman Hunt, Ford Madox Brown ed altri ne nur esis acendata
da pasiono al natural mondo, ma anke kun profunda radiki en la ciencala
e religiala idei dil epoko, e la teorii di John Ruskin.
Putin nomizas nova prima ministro
Rusa prezidanto Putin nomizis EU-delegito Mikhail Fradkov kom sua nova
prima ministro.
Sr Fradkov, olima polico-chefo, es poke konocata politikisto.
Il anuncis lo preske semano pos ke Sr Putin desengajis sua tota
ministraro por forigar PM Mikhail Kasyanov, vidita kom tro proxim rusa
oligarki e l'epoko di Boris Yeltsin.
On expektas ke Putin grande vinkos lor la prezidantal elekti eventonta
14ma marto.
L'engajo di Sr Fradkov mustos aprobesar dal Rusa parlamento, ma la
majoritatala partiso Unionita Rusia expektesas sustenar la selekto da
Sr Putin.