Historio ne sempre transmisas grandeso a nia moderna memoro equitatoze. Dum la tempo dil Granda Reformo l'eminenta figuri Martin Luther, Henry VIII, reformero Ulrich Zwindli, ed altra religioza revolucionisti ne sole definis la voyo e koncienco di Kristania. Exaltita en la korti di Europa, laudita e refuzita da universitati e teologiisti, admirita e desestimita da e protestanti e katoliki, Desiderius Erasmus esis untempe forsan la maxim admirata kristana pensero en la mondo. Il esis viro qua helpis inspirar la Reformo ma restis ferma defensero dil unionita katolika eklezio til la bitra fino. Triste lua nomo preske eskapis nia historial memoro. Ma felice, ne tote.
La nelegitima filiulo di sacerdoto elevita preter lua basa rango agnoske lua talenti, Erasmus esis teologiisto interesata pri doktrino, ma plu interesata pri la principi di vertuo qui animas la vera kristana vivo e kultivas la sulo por paco. Tilgrade il rimemoresas hodie esas ofte kom l'autoro dil esayo Laudante Foleso (skriptita kom komplimento a lua amiko, la veneracata Sir Thomas More, ma ironioze verko pri qua Erasmus ne esis tre fiera). Ma Erasmus konsilis papi e princi, fonto de sajeso serchita dal guvernanti di Europa dum la kolmo di kristana povo.
Erasmus precipue suciis en sua guidado di le granda e potenta di Europa la prezervado di paco. En L'Edukeso di Kristana Princo, skriptita por Princo Karlo V (ultime Rejo di Hispania, Nederlando, Santa Romana Imperiestro e kapo dil dinastio Habsburg) Erasmus parolas pri la potenta imperio di Alexander la Granda ma imploras Karlo agnoskar ke lua heredajo esas plu granda kam ta di Alexander, nam l'imperio di Alexander ganesis per violento.
Ma, "vu naskis a splendida imperio...tale ke, dum ke lu mustis spensar granda esforci por invado, vu forsan mustos laborar por certigar ke vu povos volunte transdonar parto de vua imperio vice sizar pluso. Vu debas ol al cielo ke vua imperio venis a vu sen violento...vua sajeso mustas nun certigar ke vu prezervez ol sen violento e pacoze."
Ti qui lektas L'Edukeso di Kristana Princo frapesos dal demokrata spirito per qua Erasmus probis instruktar le potenta di Europa. Il komencas per dicar "esas ulo preter homala naturo, ulo tote deala, en absoluta regno super libera e volanta homi." Yes, "absoluta regno" ne esas prerogativo quan ni grantus ad irgu en nia moderna demokrata epoko. Ma Erasmus suplikas Karlo e la princi di Europa kun sorto de santigo dil konsento dil guvernati. E dum ke la pagini progresas il parolas longe pri la qualesi qui devas prizesar en princo ube esas chanco selektar lu per voto; qualesi quala "kalmeso di temperamento e sobra humoro sen neprudenteso..."
Il duras per la sequanta analogajo: "Sur navo, ni ne donas la guvernilo a ta qua havas la maxim nobela ancestraro dil kompanio, la maxim granda richeso, o la maxim bela, ma al maxim habila guvernero. Simile, ni devas donar rejio ad ulu plu dotita kam le cetera per la qualesi di rejio, nome sajeso, sento di yusteso, personal represo, prevido, e sucio por la publika bonstando."
Malgre ke Erasmus agnoskis ke esas rara en lia epoko ke princo selektesas per voto (e nultempe populara voto en la poka kazi di co) l'esenco di lua instrukto esis urjar kristana princi aspirar esar la tipo de reganto quan la populo libere selektus se li darfus selektar. Tale pensante ni vidas Erasmus brilar inter la rangi de humanisti, de qui il esis la maxim famoza de sua epoko.
Ma en la tempo dil Reformo, Erasmus divenis figuro di kontroverso ne pro sua extremismo ma, astonive, pro sua moderemeso. Il priplendis l'indulgi ed altra kreski di korupteso quin il observis en la katolika eklezio. Ico videsis kom fuelizar la fairi di Lutheranismo dum ke la reformo movis trans Europa, e do multi dicis "od Erasmus lutheranigas od Luther Erasmanigas." Tamen Erasmus, revelante interna konservemismo mem dum simpatizar la forci di reformo, kredis ke paco ed uneso en l'eklezio bezonis konciliema metodo por rekomendar chanjo. Il do inkuris l'iracoza decepteso di Luther e reformeri mem kande lua verki divenis l'objekto di exploro ed en ula kazi kondamno ed exilo dal papal autoritati, la legitimeso di qui il probis defensar.
Fine, la viro untempe amita da omni divenis sola voco por paco e vertuo kontre la kreskanta marei di sektala polarigo e violento. Ma por Erasmus, quale traktas l'una l'altra esis plu granda *evidenco di vera kristanismo kam esis ideologial konsento pri omna punto di doktrino. Ne esez tro tarda por ke la moderna mondo lernez ica leciono.
(Tradukita da James Chandler.)
James Chandler 09-Nov-24